Хурхæтæны мæйы 11-æм бон онлайн-режимы Фæсарæйнаг хъуыддæгты министрты æмбырды форматы ацыдысты Республикæ Хуссар Ирыстон, Республикæ Абхаз æмæ Приднестроваг Молдаваг Республикæйы Фæсарæйнаг хъуыддæгты министртæ Джиоты Æхсар, Олег Барциц æмæ Виталий Игнатьевы æртæфарсон консультацитæ.
Фембæлды ма хайад райстой Хуссар Ирыстоны Дипломатон минæварадты сæрдæрттæ Абхаз æмæ Приднестровьейы А.Р. Кация æмæ В.В. Янковский, Абхазы Дипломатон минæварадты сæрдæрттæ Хуссар Ирыстон æмæ Приднестровьейы Елбачиты А.М. æмæ А.А. Ватман æмæ Приднестровьейы Минæварадты Сæрдæрттæ Хуссар Ирыстон æмæ Абхазы Плиты А.С æмæ Г. С. Купалба
Консультациты рæстæджы хайадисджытæ æрдзырдтой Хуссар Ирыстон, Абхаз æмæ Приднестровьейы сæйрагдæр æддагполитикон фарстатыл, республикæты алыварс ахсджиаг æхсæнадæмон уавæр æмæ социалон-экономикон размæдзыдыл, афтæмæй ма иумæйаг æддагполитикон æмгуыстады здæхтытыл.
Фембæлды фæстиуæгæн ист æрцыд æртæ республикæйы Фæсарæйнаг хъуыддæгты министрты Иумæйаг деклараци.
2026 азы хурхæтæны мæйы 11-æм бон
Республикæ Абхаз, Приднестроваг Молдаваг Республикæ æмæ Республикæ Хуссар Ирыстоны Фæсарæйнаг хъуыддæгты министрты Иумæйаг деклараци
Мах, Республикæ Абхаз, Приднестроваг Молдаваг Республикæ æмæ Республикæ Хуссар Ирыстоны æддагполитикон уагдæтты сæрдæрттæ, нæ паддзахадты 'хсæн æмгуыстад æмæ æдасдзинады фадыджы, афтæмæй ма ахсджиаг æхсæнадæмон фарстаты фæдыл 2026 азы хурхæтæны мæйы 11-æм бон ацæугæ Фембæлды фæстиуæгæн, хъусын кæнæм:
1. Республикæ Абхаз, Приднестроваг Молдаваг Республикæ æмæ Республикæ Хуссар Ирыстон сты суверенон паддзахадтæ, кæцытæ сырæзтысты сæ адæмы фæндонмæ гæсгæ. Æппæт адæмæн дæр ис сæ фидæн æмæ политикон арæзтад сæхи къухтæй равзарыны бар, уый – æхсæнадæмон барады сæйрагдæр принциптæй иу, кæцы у ИНО-йы Уагæвæрды сфидаргонд.
2. Фидарæй лæуд стæм æртæ республикæйы адæмты хæрзиуæгæн æмгуыстад уæрæх кæныныл, æмæ дарддæр дæр хæст уыдзыстæм демократи, адæймаджы бартæ æмæ сæрибары принциптыл.
3. Тырнæм историон рæстдзинад сног кæнынмæ æмæ нысан кæнæм, æхсæнадæмон уавæры ивындзинæдтæ кæй гом кæнынц ног фæндаг бирæполярон дуне фидар кæнынæн. Фæлæ уынæм уый дæр, æмæ ацы процесс кæй нæу стабилон.
4. Стæм политикон, экономикон, информацион æмæ гуманитарон æндæвдады ныхмæ, кæцы здæхт у æртæ паддзахады адæмты бартæ фехалынмæ. Сидæм дунеон æмæхсæнадмæ, цæмæй архайой æхсæнадæмон барады нормæты бындурыл æмæ банымайой Абхаз, Приднестровье æмæ Хуссар Ирыстоны хæдбар паддзахадты хуызы.
5. Абхаз, Приднестровье æмæ Хуссар Ирыстоны хæдбардзинады æхсæнадæмон банымадæн ахсджиаг нысаниуæг дæтгæйæ, нымайæм, æнæмæнг кæй у быцæуаг фарстатæ æрмæстдæр дипломатон хуызы æрбæстон кæнын.
6. Мах хæст стæм демократон принциптæ, бирæполярон дуне æмæ интеграцион процесстæ размæ кæныны хъуыддагыл, уæлдайдæр Уæрæсейы Федераци æмæ Глобалон Хуссары бæстæтимæ.
7. Дарддæр дæр тырнæм Уæрæсейы Федерациимæ æппæтварсон æмгуыстад уæрæх кæнынмæ, кæцы у уый æвварс, цæмæй æртæ республикæйы адæм сæ хъысмæт сæхи къухтæй æвзарой. Дунеон æндыгъд уавæр хынцгæйæ, нысан кæнæм Уæрæсейы æппæтварсон æххуыс политикон, экономикон æмæ гуманитарон фадгуыты. Ахсджиаг у Уæрæсейы бынат Скæсæн Европæ æмæ Хуссар Кавказы сабырад æмæ æдасдзинад бахъахъхъæнынæн.
Фембæлды фæстиуæгæн Республикæ Абхаз, Приднестроваг Молдаваг Республикæ æмæ Республикæ Хуссар Ирыстоны Фæсарæйнаг хъуыддæгты министртæ бадзырдтой æдзухон консультацитæ уадзынмæ дывæрсон æмæ бирæварсон æмгуыстады ахсджиагдæр фарстаты фæдыл, уый хыгъд æртæ паддзахадты интерестыл æндаваг æхсæнадæмон æдасдзинады фадыджы дæр.