Зæрдæвæрæны мæйы 5-æм бон Республикæ Хуссар Ирыстоны Фæсарæйнаг хъуыддæгты министр Джиоты Æхсар хайад райста цытджын церемони – Стыр Фыдыбæстæйон хæсты Фæуæлахизæй 80 азы рацыд æмæ Хуссар Ирыстонæй Советон Цæдисы хъайтарты номыл зæрдылдарæн згъæрæхцаты серийы презентацийы.
Монетæтæ рауагъта Хуссар Ирыстоны Национ банг Президент Гаглойты Аланы хъæппæрисæй.
Мадзал ацыд Хетæгкаты Къостайы номыл Хуссар Ирыстоны Паддзахадон драмон театры æмæ дзы хайад райстой Республикæйы Къухдариуæгад Президент Гаглойты Аланы сæргълæудæй, Уæрæсейы Минæвар Хуссар Ирыстоны Марат Кулахметов, Мæскуыйы Згъæрæхцайы кæрты директор Андрей Иванцов, СФХ-йы фæсчъылдымы ветерантæ æмæ ветеранты хиуæттæ.
Монетæты серийы ис аст Советон Цæдисы хъайтартæ Остъаты Алекси, Кобылты Серги, Цоциты Уасил, Хъоцыты Константин, Сабанты Григори, Беруашвили Георги, Цхуырбаты Иван æмæ Козаты Сардионы портреттимæ. Монетæтæй иу уагъд æрцыд Стыр Фыдыбæстæйон хæсты Советон Цæдисы Фæуæлахизы цытæн.
Монетæтæ уагъд æрцыдысты Мæскуыйы згъæрæхцайы кæрты. Советон Цæдисы хъайтарты портреттимæ монетæты нымæц у 200 экземпляры, Уæлахизы бонæй 80 азы рацыды цытæн та – 300 экземпляры.
2025 азы зæрдæвæрæны мæйы 5-æм бон