2014 азы 10-20 январы Республикæ Хуссар Ирыстоны Фæсарæйнаг хъуыддæгты министр Санахъоты Давид æмæ горæт Цхинвалы мэр Æлборты Алан кусæгон балцы уыдысты Италийы. Визиты нысан уыдис Итали æмæ Хуссар Ирыстоны хæлардзинады Ассоциацийы хайадистæй Цхинвал æмæ Ланузейы горæтты ´хсæн хæлардзинады Бадзырдыл къухтæ æрфыссын, кæцы æххæст æрцыдис 2014 азы 13 январы г. Ланузейы. Фидыдыл сæ къухтæ æрфыстой горæт Цхинвалы мэр Æлборты Алан æмæ горæт Ланузейы мэр Давидэ Ферелли. Ацы документ ахъаз кæндзæнис ацы дыууæ горæты ´хсæн æмахастытæ хуыздæр кæнынæн æмæ хуссарирыстойнаг æмæ италийаг адæмты ´хсæн хæларадон æмæ культурон бастдзинæдтæ фидардæр кæнынæн.
РХИ Фæсарæйнаг хъуыддæгты министр Санахъоты Давидыл Сан-Маринойы зæрдиагæй фембæлдысты «Итали - Хуссар Ирыстоны хæлардзинады Ассоциацийы» минæвæрттæ æмæ Сан-Маринойы РХИ Фæсарæйнаг хъуыддæгты министрады сæрмагонд минæвар Эпифанио Троина, кæцытæн сæ архайд здæхт у Хуссар Ирыстоны тыххæй информаци парахат кæнынмæ æмæ йын Европæйы йæ имидж фидар кæнынмæ, афтæ ма Хуссар Ирыстоны æмæ Италийы ´хсæн æнгом политикон æмæ культурон æмахастытæ уæрæхдæр кæнынмæ.
Дарддæр министрæн къорд фембæлдтытæ уыдис Италийы политикон партийы минæвæрттимæ, сæрмагондæй та, Сан-Маринойы Парламентон къорды сæрдар Парида Андреолиимæ, Чырыстон-демократон партийы сæрдар Габриел Гаттиимæ æмæ парти «Синистра Унита»-йы сæрдар Иван Фоскиимæ. Ацы фембæлдтыты Санахъоты Давид, уым чи уыдис, уыдон базонгæ кодта Хуссар Ирыстоны истори æмæ политикон ситуациимæ.
Италимæ визиты рæстæджы ма йæ хайадисджытæн фембæлд уыдис г.Тертенияйы мэр Лоддо Лучиано æмæ г.Теральбайы мэр Пиетро Паоло Пирасимæ, кæцыты рæстæджы уынаффæ цыдис горæтарæзтады æмæ хæрзарæзтады фарстатыл. Санахъоты Давид æмæ Æлборты Алан Италийы уыдысты цалдæр куыстуаты, улæфæн æмæ агротуризмы центрты, фембæлдысты Ольястрайы провинцы туристон æмæ уазæгдонон бизнесы минæвæрттимæ, кæцыты рæстæджы бадзырдтой, дыууæ фарсæн дæр æмкуысткæнынады пайда чи сты, уыцы фарстатыл.
27 январы Республикæ Хуссар Ирыстоны Фæсарæйнаг хъуыддæгты министр Санахъоты Давид æмæ горæт Цхинвалы администрацийы сæргълæууæг Æлборты Алан Италимæ сæ балцы фæстиуджыты фæдыл пресс-конференци сарæзтой дзыллон информацийы фæрæзты кусджытæн.
Цхинвал, 2014 азы 27 январь