Адæймаджы барты фæдыл Европæйы тæрхондон радон хатт сарæзта иуфарсон, субъективон къахдзæф æмæ райста уынаффæ, кæцыйы аххосджын кæны Уæрæсейы «2008 азы хæстон конфликты рæстæджы аст гуырдзиаг уацары» бартæ фехалыны хъуыддаджы.
Рæстдзинады сæрыл тохгæнджытæ ферох кодтой швейцариаг дипломат Хайди Тальявинийы сæргълæудæй ЕЦ-йы къамисы куысты хатдзæгтæ, кæцытæм гæсгæ 2008 азы Хуссар Ирыстонмæ æрбабырсты фæдыл Гуырдзыстон нымад æрцыд агрессорыл. Æнæ хъусдардæй ныууагътой гуырдзиаг националистты къухтæй фæмард мингай амæттæгты нымæц. Нæдæр æркастысты гуырдзиаг парламенты фæдæвзарæн æрмæджытæм, кæцыты аххосджын кæнынц Саакашвилийы хицауады кæцыдæр минæвæртты. Ам хъæуы банысан кæнын уый, æмæ сæ аххосджын кæнынц Хуссар Ирыстонмæ æрбабырсты фæдыл нæ, фæлæ ирон адæмы скуынæг кæнынæн сæ тугамæхст фæнд «Сыгъдæг быдыр» кæй нæ сæххæст кодтой, уый тыххæй.
Цытджын тæрхонгæнджыты нæдæр бацымыдис кодта, цы архайдтой æд танктæ уыцы аст æфсæддон æмæ мингай гуырдзиаг солдаты Хуссар Ирыстоны хъæуты æмæ горæты?! Гуырдзиаг артиллери цæмæн фестын кодта пырхæнтæ Цхинвалы рынчындон æмæ адæмы хæдзæрттæ?! Цæмæн æхста уæрæсейаг æмæ ирон фидауынгæнджыты позицитæ, кæцытæ Цхинвалы уыдысты æхсæнадæмон мандаты фæлгæтты?! Уыцы «тæрхонгæнджыты» нæдæр æндавы мингай æнаххос ирон адæмы мæлæт æмæ Гуырдзыстоны æбæрæгæй фесæфт ирæтты хъысмæт, кæцыты тыххæй информаци официалон Тбилис абоны бон дæр нæ хъæр кæны! Фæлæ уый æндæр фарста у...
Хъыгагæн, кæддæры размæдзыд Европæ арæхдæр райдыдта æвдисын дывæр стандарттæ æмæ политикон нæрастдзинад, уый нымæцы гуырдзыстоны интерестæ размæ кæнын дæр. Бирæ цæлхдурты сæрты рацæугæйæ, хуссарирыстойнаг адæм хорз зонынц хæлардзинады аргъ æмæ дарддæр цæуынц хæларадон бæстæтæ æмæ адæмимæ, фыццаджыдæр, Уæрæсеимæ, бастдзинæдтæ фидар кæныны фæндагыл.
2026 азы хурхæтæны мæйы 24-æм бон