Цыппурсы мæйы 4-æм бон Республикæ Хуссар Ирыстоны Информаци æмæ мыхуыры комитеты ацыд азы фæстиуджыты фæдыл Республикæ Хуссар Ирыстоны Фæсарæйнаг хъуыддæгты министр Джиоты Æхсары пресс-конференци.
Конференцийы рæстæджы Джиоты Æхсар радзырдта ацæугæ азы Министрады куысты фæдыл æмæ бахахх кодта, æддагон политикæйы сæйрагдæр здæхт кæй у стратегион партнер – Уæрæсейы Федерациимæ хæларадон ахастытæ æмæ интеграцион бастдзинæдты размæдзыд.
УФ-йы ФХъМ газет «Известия»-йæн йæ комментарийы банысан кодта, Мæскуыйæн йæ позици кæй у, цæмæй Уæрæсе æмæ Гуырдзыстоны хсæн политикон диалог сног уа, афтæмæй ма æнæмæнгыл нымайы Хуссар Ирыстон æмæ Абхазы хæдбардзинад банымайыны фæдыл уынаффæ. Гуырдзыстоны Премьер-министр И. Кобахидзе разы нæу уыцы позицийыл, йæ ныхæстæм гæсгæ, Гуырдзыстонæн уый у «сырх хахх».
Джеоргуыбайы мæйы 30-æм бон Приднестроваг Молдаваг Республикæйы ацыдысты Уæлдæр Советы VIII æрсидты депутаттæ, бынæттон Советты адæмон депутаттæ æмæ Советты сæргълæуджытæ-хъæуты администрациты сæрдæртты æвзæрстытæ. ПМР-йы ЦÆК æвзæрстытæ банымадта æнтысджыныл.
Æхсæнадæмон цæстдарджыты бæрæггæнæнтæ куыд равдыстой, афтæмæй, æддагон æндæвдады фæлварæнтæм нæкæсгæйæ, æвзæрстытæ ацыдысты Республикæйы æппæт барадон нормæтæ æмæ æхсæнадæмон фæткмæ гæсгæ.
Джеоргуыбайы мæйы 28-æм бон Хетæгкаты Къостайы номыл гимназ «Альбион»-ы ацыд Æвзонг дипломатты клубы цытджын баконд. Мадзалы хайад райстой Республикæ Хуссар Ирыстоны ФХъМ-йы Æвзонг дипломатты советы Сæргълæууæг Санахъоты А.Г. æмæ РХИ-йы ФХъМ-йы Æддагполитикон бастдзинæдты управленийы консультант Уалыты Е.П.
Рабадты рæстæджы ахуырдзаутæ равдыстой сæ цымыдисдзинад æхсæнадæмон ахастыты истори æмæ дипломатимæ. Скъоладзаутæ радзырдтой Хуссар Ирыстон æмæ Уæрæсейы æддагон политикæйы райрæзты ахсджиагдæр рæстæджытыл.
Республикæ Хуссар Ирыстоны Фæсарæйнаг хъуыддæгты министр Джиоты Æхсар арвыста арфæйы фыстæг райгуырæн боны цытæн Республикæ Никарагуайы Фæсарæйнаг хъуыддæгты министр Денис Роналдо Монкада Колиндресмæ.
Сæрмагондæй, арфæйы дзырдæуы:
«Зынгæ паддзахадон архайæг æмæ дипломат, дæ бæстæйы патриот æмæ æмбæстаг уæвгæйæ, бирæ азты дæргъы æхсæнадæмон аренæйы бæрнонæй хъахъхъæныс Никарагуайы национ интерестæ. Де стыр профессионализм, дæ адæм æмæ йæ историмæ цыт бæрæг сты бæстæйы æддагполитикон уагдоны раз лæууæг хæстæ куыд бæрнонæй æххæст кæныс, уый мидæг.
Республикæ Абхазы Конституцийы боны фæдыл Республикæ Хуссар Ирыстоны Фæсарæйнаг хъуыддæгты министр Джиоты Æхсар арвыста арфæйы фыстæг Республикæ Абхазы Фæсарæйнаг хъуыддæгты министр Олег Барцицмæ.
Сæрмагондæй, арфæйы дзырдæуы:
«Ацы ахсджиаг документ ист æрцыд паддзахаддзинады райрæзты рæстæджы æмæ фидар бындур æрæвæрдта абхазаг хæдбардзинад æмæ суверенитетæн, ссис абхазаг адæмы сæрибар размæдзыды барадон æвдисæн æмæ снысан кодта бæстæйы размæдзыды фæндаг.
Джеоргуыбайы мæйы 23-æм бон Хуссар Ирыстоны нысан цæуы Æхсардзинад æмæ Адæмон Иудзинады бон, кæцы официалон æгъдауæй расидтæуыд Республикæ Хуссар Ирыстоны Президенты 2010 азы джеоргуыбайы мæйы 23-æм бонæй Барамындмæ гæсгæ. Ацы бон 1989 азы мингай гуырдзиаг националисттæ гæрзифтонгæй æрбацыдысты Цхинвалмæ æнæбасæтгæ ирæттæн «зонд бацамоныны» фæндимæ. Фæлæ сæ фæндтæ сæ къухты нæ бафтыдысты. Ирон адæм æрбаиу сты æмæ сын сæ фæндаг æрæхгæдтой. Уый уыд национ иудзинады æвдисæн.
Афтæ райдыдта хуссарирыстойнаг адæмы тох сæ сæрибар æмæ хæдбардзинадыл, национ размæдзыд æмæ сæ бартыл.
Джеоргуыбайы мæйы 21-æм бон Республикæ Хуссар Ирыстоны Фæсарæйнаг хъуыддæгты министр Джиоты Æхсар бабæрæг кодта зынгæ политикон архайæг æмæ ахуыргонд, историон зонæдты кандидат Пухаты Петры фырт Константины чиныг «Ирæтты геноциды истори 1920»-ы презентаци, кæцы ацыд Уанеты Захары номыл Хуссар Ирыстоны зонадон-иртасæн институты (ХИЗИИ) Хъæбатырдзинад æмæ адæмон иудзинады боны цытæн.
Чиныджы бæстонæй æркастæуыд 1920 азы цаутæм, кæцытæ æнустæм баззайдзысты ирон адæмы бирæазон национ-ссæрибаргæнæн тохы историйы.
Джеоргуыбайы мæйы 18-æм бон Европæйы Советы Министрты комитеты рабадты рæстæджы рæгъмæ рахастæуыд Европæйы Советы Генералон секретары 32-æм иугонд доклад «Гуырдзыстоны конфликт», кæцыйы Хуссар Ирыстоны уавæр æвдыст цæуы иуварсонæй æмæ сыдывдæй.
Сæрмагондæй, доклады æвдыстæуы сыхаг паддзахады хицауад кæй «тыхсынц» Хуссар Ирыстоны æдасдзинад, гуманитарон æмæ адæймаджы барты фадыджы уавæрыл, лигъдæтты фæстæмæ ‘рыздæхыны проблемæйыл.
Джеоргуыбайы мæйы 17-æм бон гуырдзиаг дзыллон информацион фæрæзтæ апарахат кодтой Гуырдзыстоны парламенты сæрдар Ш. Папуашвили æмæ Тбилисы мэр К. Каладзейы Хуссар Ирыстоны афтæ хуыйнæг рæстæгмæ администраци суæгъд кæныны фæдыл комментаритæ.
Сæрмагондæй, гуырдзиаг парламенты сæрдар Папуашвили йæ раныхасы æппæрццагæй саргъ кодта 2006 азы Тбилисы дæлбар уæвæг Хуссар Ирыстоны территоритыл ацæугæ æвзæрстытæн, æмæ банысан кодта, уымæй гуырдзиаг хицауад кæй ратта «легитимондзинад сепаратистон процесстæн», уый рацыд Гуырдзыстоны «паддзахадон интересты» ныхмæ.
Джеоргуыбайы мæйы 13-æм бон Мæскуыйы ацыд Республикæ Хуссар Ирыстоны Фæсарæйнаг хъуыддæгты министр Джиоты Æхсары æмæ Уæрæсейы æмæ Беларусы Цæдисон паддзахады Паддзахадон секретарь Сергей Глазьевы фембæлд.
Ныхасы рæстæджы æрдзырдæуыд Хуссар Ирыстоны æмархайды фæдыл Цæдисон паддзахады структурæтимæ, сæрмагондæй, гуманитарон æмæ культурон фадгуыты.
Фембæлды ма хайад райстой Цæдисон паддзахады Æнæивгæ Комитеты Социалон политикæ æмæ информацион ифтонгады Департаменты Сæрдар Ольга Бороненко æмæ УФ-йы уæвæг РХИ-йы Минæварады Уынаффæгæнæг Денис Долгушев.
2025 азы джеоргуыбайы мæйы 12-æм бон Женевæйы ацыд Фæскавказы стабилондзинад æмæ æдасдзинады фæдыл Æхсæнадæмон дискусситы 65-æм раунд. Дискусситæ цæуынц Медведев æмæ Саркозийы 2008 азы майрæмты мæйы 12-æм æмæ рухæны мæйы 8-æм бонты бадзырдадтæм гæсгæ. Фембæлды хайад райстой Республикæ Хуссар Ирыстоны, Республикæ Абхазы, Гуырдзыстоны, Уæрæсейы Федерацийы, Америкæйы Иугонд Штатты делегацитæ, афтæмæй ма Европæйы Цæдисы, Иугонд Нациты Организацийы, Европæйы Æдасдзинад æмæ æмгуыстады фæдыл организацийы минæвæрттæ.
