Æрвыл аз дæр тæргæйтты мæйы 18-æм бон Хуссар Ирыстоны ссарынц Ереды трагедийы чи фæмард, уыдон рухс нæмттæ. Уыцы цау ссис геноциды политикæйы радон æвдисæн, кæцы Гуырдзыстоны хицауад сæдæ азы дæргъы уагъта ирон адæмы ныхмæ.
1991 азы тæргæйтты мæйы 18-æм бон Ереды хъæумæ хæстæг гуырдзиаг лæгсырдтæ бацахстой автомашинæ «Урал» æмæ дзы рахизын кодтой 25 ирон адæймаджы. Сылгоймæгтæ æд сывæллæттимæ куыддæрты фервæзтысты, фæлæ дзы 12 нæлгоймагæн фæфыдмитæ кодтой, уый фæстæ сæ удæгасæй баныгæдтой æмæ сын сæ бынат бульдозерæй сраст кодтой. Уыцы бынат ссарын бантыст æрмæстдæр дыууæ аз æмæ рдæгы фæстæ. Никæй уырныдта уыцы æвирхъаудзинадæн уæвæн кæй ис, уый.
35 азы размæ ‘рцæугæ тугæйдзаг æмæ æгъатыр цауæй абоны бон дæр зæрдæ ныккæрзы, уый у ирон адæмы æнæбайгас хъæдгом.
Ацы бон ацыд фыдохы митинг æмæ æфсымæрон уæлмæрдмæ дидинтæ сæвæрыны церемони.
Мысæн мадзалы хайад райстой Республикæ Хуссар Ирыстоны Фæсарæйнаг хъуыддæгты министр Джиоты Æхсар æмæ Министрады кусджытæ.
Ирыхъæуы (Еред), цыран трагедийы амæттæгты номыл арæзт æрцæудзæн мемориалон комплекс, сагъд æрцыдысты зазбæлæстæ – фæмардуæвджыты рухс ном сæнусон кæнынæн æмæ куыд сабырады символ.
2026 азы тæргæйтты мæйы 18-æм бон