Женевæ, 2025 азы тæргæйтты мæйы 6-æм бон
2025 азы тæргæйтты мæйы 4-5 бонты Женевæйы ИНО-йы Нациты галуаны ацыд Фæскавказы стабилондзинад æмæ æдасдзинады фæдыл Æхсæнадæмон дискусситы 63-æм раунд. Фембæлды хайад райстой Республикæ Хуссар Ирыстоны, Республикæ Абхазы, Гуырдзыстоны, Уæрæсейы Федерацийы, Америкæйы Иугонд Штатты делегацитæ, афтæмæй ма Европæйы Цæдисы, Иугонд Нациты Организацийы, Европæйы Æдасдзинад æмæ æмгуыстады фæдыл организацийы минæвæрттæ. Хуссарирыстойнаг делегацийы сæргъ лæууыд Президенты Паддзахадон Уынаффæгæнæг Коцты Константин.
Уæлдай хъусдард аздæхтæуыд регионалон æдасдзинады уæвæг фарстытæм. Нысангонд æрцыд Инциденттæ аиуварс кæнын æмæ сæм афоныл хъус æрдарыны фæдыл механизмы архайды ахсджиагдзинад æмæ уый фæлгæтты бастдзинады «тæвд хахх»-ы фæстиуæгджын куыст. Хуссарирыстойнаг делегаци ногæй æрсидт гуырдзиаг фарсмæ Хуссар Ирыстон æмæ Гуырдзыстоны 'хсæн паддзахадон арæны делимитаци æмæ демаркацийы фæдыл иумæйаг куыстмæ.
Хуссар Ирыстон, Абхаз æмæ Уæрæсейы Федерацийы делегацитæ уыдысты æмсæрдæртты хъуыдыйы ‘вварс, цæмæй тыхæй ма спайда кæныны фæдыл иумæйаг фидиуæныл куыст сног уа. Хуссарирыстойнаг фарсæрдыгæй хаххгонд æрцыд, ахæм фидиуæн кæй уыдзæн юридикон æгъдауæй хæсджынгæнæг бадзырд бафыссынмæ къахдзæф, кæцыйы фæрцы Республикæ Хуссар Ирыстон æмæ Республикæ Абхаз хъахъхъæд уыдзысты Гуырдзыстоны ‘рдыгæй ног гæрзифтонг агрессийæ.
Хуссарирыстойнаг делегаци хъус æрдардта æбæрæгæй фесæфтуæвджыты хъысмæт сбæрæг кæныны тыххæй куыст сног кæнынмæ æмæ æрсидт гуырдзиаг фарсмæ, цæмæй ацы проблемæйы фæдыл куысты цыд ма лæууын кæна æмæ йе скъуыддзаг кæнынæн къахдзæфтæ араза.
Гуырдзыстон кæй халы ирæтты – Хъазыбеджы районы (Тырсыгом) цæрджыты бартæ, кæдонæн цалдæр азы дæргъы сæ бон нæу сæ райгуырæн уæзæгмæ бахауын, уый тыххæй та ногæй æрцыд загъд.
Радон хатт хуссарирыстойнаг минæвæрттæ хъус æрдардтой Хуссар Ирыстоны цæрджыты ‘рдæм кæцыдæр бæстæты визæты политикæйы дискриминацион здæхтмæ æмæ æмсæрдæртты рæгъмæ рахастой уынаффæ, цæмæй æрсидтæуа бæрæг бæлвырд паддзахадты хицауадтæм, æмæ ацы проблемæ скъуыддзаг æрцæуа.
Лигъдæтты проблемæйы фæдыл ацы раунды дискусси нæ ацыд. Лигъдæтты темæйыл ныхас сног кæныны фадат уыдзæн æрмæстдæр уæд, кæд æмæ Гуырдзыстон æрлæууын кæна ацы проблемæйы аразгæ политизаци.
Ацæугæ фембæлды хайадисджытæ банысан кодтой Фæскавказы æдасдзинад æмæ стабилондзинады фæдыл Æхсæнадæмон дискусситы ахъаздзинад. Дискусситы радон фембæлд нысангонд æрцыд 2025 азы хурхæтæны мæймæ.