Майрæмты мæйы 24-æм бон ацыд Республикæ Хуссар Ирыстоны Фæсарæйнаг хъуыддæгты министр Джиоты Æхсары фембæлд Приднестроваг Молдаваг Республикæйы Фæсарæйнаг хъуыддæгты министрады Сæйраг æддагполитикон управленийы сæрдар Дмитрий Паламарчукимæ, кæцы делегацийы сæргъ æрцыд Цхинвалмæ Уæрæсейы Федерацийы ‘рдыгæй Республикæ Хуссар Ирыстоны хæдбардзинады банымадæй 15 азы рацыды фæдыл мадзæлттæм.
Джиоты Æхсар раарфæ кодта уазджытæн, Приднестровьейæн ахæм зын рæстæджы кæй саккаг кодтой æмæ кæй æрцыдысты Хуссар Ирыстонмæ, уый фæдыл. Уымæй дарддæр ма банысан кодта, абоны бон регионы сабырад, æдасдзинад бахъахъахъæнын æмæ Днестры фидауынгæнæн операцийы ахадындзинад кæй сты сæйрагдæр фарстытæ.
Дмитрий Паламарчук ПМР-йы Фæсарæйнаг хъуыддæгты министрады номæй ратта арфæйы фыстæг РХИ-йы Фæсарæйнаг хъуыддæгты министрадмæ.
Ныхасы рæстæджы дыууæ фарс дæр сæ хъуыды загътой хæларадон хуссарирыстойнаг- приднестроваг ахастыты фæдыл, афтæмæй ма æрдзырдæуыд боны регионалон фæткы кæцыдæр фарстытыл.
Фембæлды хайадисджытæ ныфс дарынц, Хуссар Ирыстон æмæ Приднестровьейы ‘хсæн ахастытæ дарддæр дæр æнтысджынæй кæй рæздзысты.
Фембæлды уыд Приднестроваг Молдаваг Республикæйы Официалон минæварады сæрдар Республикæ Хуссар Ирыстоны Плиты Алан, Приднестровьейы ФХъМ-йы Финанстæ æмæ фæсарæйнаг уагдæтты куысты фæдыл управленийы сæрдар Ирина Молчанова æмæ Хуссар Ирыстоны ФХъМ-йы Æддагполитикон бастдзинæдты управленийы сæрдар Джиджджойты Таймураз.
Цхинвал, 2023 азы майрæмты мæйы 24-æм бон