Нæ хъус æрдардтам ИНО-йы Æдасдзинады советы фæлгæтты Латви, Дани, Франци, Греци, Иугонд Къаролад, Австри æмæ Португалийы номæй арæзт фидиуæн «Гуырдзыстоны суверенон территоритæ – Абхаз æмæ Цхинвалы регион»-мæ.
Радон хатт та банысангонд паддзахадты æмæ се ‘мцæдисонты зæрдыл лæууын кæнæм, 90-æм азтæй фæстæмæ Хуссар Ирыстон æмæ Абхазы ‘рдæм цæуæг гуырдзиаг къухдариуæгады фыдракæндты сусæг кæныны политикæ ахъаз кæй уыд дарддæры конфликттæн, кæцытæ 'ркодтой мингай амæттæгтæм.
Хъыгагæн, 2008 азы майрæмты мæйæ рацæугæ рæстæгмæ европæйаг политиктæ нæ сахуыр сты уавæрмæ уæрæх æмæ раст цæстæй кæсын. Уæвæг æцæгдзинад уынынц сыдывд æмæ зыгъуыммæйæ. Европæйæн æмæ, сæрмагондæй, Гуырдзыстонæн афон у, цæмæй райсой æстдæс азы дæргъы Фæскавказы регионы сæвзæргæ ног уавæр æмæ ног хæдбар паддзахадты – Республикæ Хуссар Ирыстон æмæ Республикæ Абхазы.
Хуссар Ирыстонæн Уæрæсейы Федераци уыд æмæ у йе ‘дасдзинады иунæг гарант. Кæцыфæнды паддзахады афтæ хуыйнæг иумæйаг æмæ хицæн фидиуæнтæй уымæн фæивæн нæй. Хуссарирыстойнаг-уæрæсейаг æмархайды размæдзыд æмæ уæрæхкæнынад, барадон бындуры сфидаргонд дывæрсон ахастыты æппæтварсон райрæзт, уый нымæцы æддагон политикæ, хъахъхъæнынад, æдасдзинад, социалон-экономикон æмвæзад хуыздæр кæныныл куыст, æнæдызæрдыгæй, дарддæр цæудзæн.
Цæмæй регионы сабырад æмæ стабилондзинад хъахъхъæд цæуой, уый тыххæй хъæуы бæстæты 'хсæн æмбар диалог. Уый хыгъд ахсджиаг у Хуссар Ирыстоны интерестæ хынцын, йæ мидхъуыддæгтæм мацы бар дарын æмæ тыхæй спайда кæныны тæссагдзинад ма аразын. Ацы принциптæ фидаргонд сты ИНО-йы Уагæвæрды, æмæ уый та у ахæм организаци, кæцыйы фæзуатмæ егъау ныгуылæйнаг паддзахадтæ тæрсынц бауадзын ахæм чысыл бæстæты, куыд Республикæ Хуссар Ирыстон æмæ Республикæ Абхаз.
2026 азы майрæмты мæйы 21-æм бон