Нæ хъус æрдардтам Европæйы цæдисы номæй æрæджыйы фидиуæнмæ, цыран нысан цæуы Сирийы Адæмон æмбырдимæ Брюсселы «кусыны» фæнд, цæмæй Дамаскы суверенон уынаффæтæ ивд æрцæуой. Ныхас цæуы сириаг къухдариуæгадыл бандавыны фæлварæнтыл, цæмæй сисой Хуссар Ирыстон æмæ Абхазы хæдбардзинады банымад.
ЕЦ-йы ахæм фидиуæнтæ нымайæм суверенон паддзахады мидхъуыддæгтыл гуымир æгъдауæй æндæвдадыл. Евроцæдис æрмæстдæр ныхæстыл æвдисы, кæй у хæст æхсæнадæмон барады принциптæ æмæ паддзахадон суверенитетæн цыт кæныныл, фæлæ æцæгæй та хъары хæдбар Сирийæн йæ фæнд, кæцы æддагполитикон уынаффæтæ иса, кæцытæ та нæ.
Радон хатт европæйаг чиновниктæн сæ зæрдыл лæууын кæнæм, 2018 азы Сириаг Араббаг Республикæйы 'рдыгæй Республикæ Хуссар Ирыстоны хæдбардзинады банымад ссис суверенон паддзахады сæрибар уынаффæ, кæцы бындуриуæг кæны историон рæстдзинадыл. Ацы уынаффæйы ист дзуапп дæтты æхсæнадæмон барады æппæт нормæтæн дæр æмæ йын фæивæн нæй цыфæнды æддагон тыхты æндæвдады бын дæр.
Брюссель йæ экономикон æмæ политикон æндæвдады фæрцы фæлвары Фæскавказы сæвзæргæ геополитикон уавæр фæивынмæ. Ахæм фæлварæнтæ канд æнæфæстиуæгджын не сты, фæлæ ма уавæр ноджы æндыгъддæр кæнынц. Сæ фæнд æндæр бæстæтæн хъарыны бæсты, Евроцæдисæн ахсджиаг у, цæмæй Хуссар Ирыстоны хæдбардзинады банымадмæ æцæг цы ‘ркодта, уымæ йæ хъус æрдара. Сæйрагдæр – Гуырдзыстоны агрессивон политикæ, кæцыйы фæстиуæгæн 2008 азы ирон адæм лæууыдысты скуынæг кæныны тæссагдзинады раз.
2026 азы сусæны мæйы 21-æм бон