Хурхæтæны мæйы 4-æм бон ИНО-йы Генералон ассамблейы 80-æм сессийы фæлгæтты радон хатт ист æрцыд Гуырдзыстонæй сразæнгардгонд Хуссар Ирыстон æмæ Абхазæй лигъдæттæ æмæ мидбынаты иу ранæй иннæ ранмæ цæрынмæ чи ацыд, уыдоны уавæры фæдыл резолюци. Хъыгагæн та уынæм, æхсæнадæмон фæзуат кæй дарддæр кæны уавæры æцæгдзинадæн дзуапп чи нæ дæтты, ахæм позицийыл хæцыны хъуыддаг.
Кæддæр нымад æхсæнадæмон фæзуат фæстаг азты активонæй размæ кæны ирон æмæ абхазаг адæмы ныхмæ Гуырдзыстоны деструктивон политикæ. Бынтондæр дзы нæ цæуы дзырд мингай амæттæгтыл, сæдæ мин ирон æмæ абхазаг адæймаджы сæ хæдзæрттæй кæй баййæфтой сырд æрмæстдæр ирæттæ æмæ абхазæгтæ кæй сты, уый тыххæй. Æппæт уыцы факттæ сусæг кæй цæуынц, уый дзурæг у æрмæстдæр гуырдзиаг национализмы фыдракæнд политикæ сраст кæныны фæлварæнтыл.
Нысан кæнæм уый, æмæ хуссарирыстойнаг æмæ абхазаг минæвæртты æнæ хайадистæй лигъдæтты проблемæ политизацигæнгæйæ, гуырдзиаг фарс дарддæр пайда кæны ИНО-йы фæзуатæй, цæмæй йæ политикон интерестæ размæ кæна. Уымæй дарддæр ма зыгъуыммæ кæны историон цаутæ, цæмæй йæхæдæг æвдыст æрцæуа æнаххос фарсыл.
Гуырдзиаг режим 2008 азы сабырадмæ æркæныны операцийы фæстиуджытыл абоны бон дæр кæй нæу разы æмæ уæвæг æцæгдзинадыл кæй æхгæны йæ цæстытæ, уый махæн уæлдай хатт æвдисы Республикæ Хуссар Ирыстоны раст æмæ æнæфæивгæ историон къахдзæф – Уæрæсейы Федерациимæ хæларадон ахастыты æппæтварсон фидаркæнынад.
Æцæгдзинадæй дард цы документтæ сты, уыдоны райст нæу ахъаз уæвæг проблемæтæ æрбæстон кæнынæн, фæлæ регионы сабырад æмæ æдасдзинадæн æвзæрын кæны æрмæстдæр цæлхдуртæ.
Ныфс дарæм, дунеон æмæхсæнад, фыццаджыдæр, Иугонд Нациты Организаци, куыдфæстагмæ æппæтварсонæй кæй æркæсдзысты уавæрмæ æмæ йæ кæй нал политизаци кæндзысты, уымæн æмæ уæвæг зындзинæдтæ афтæмæй кæнынц æрмæстдæр æндыгъддæр.
2026 азы хурхæтæны мæйы 5-æм бон