Ӕртхъирӕны мӕйы 10 бон Республикӕ Хуссар Ирыстоны Фӕсарӕйнаг хъуыддӕгты министр Джиоты Ӕхсар видеоконференцийы хуызы хайад райста Приднестроваг Молдаваг Республикӕйы Фӕсарӕйнаг хъуыддӕгты министрады Коллегийы дзуаппдӕттӕн рабадты. Видеоконференци уагъд ӕрцыд Дипломатон кусӕджы боны цытӕн.
Рабадты хайад райстой Приднестроваг Молдаваг Республикӕйы Президент Вадим Красносельский, Республикӕ Арцахы Фӕсарӕйнаг хъуыддӕгты министр Сергей Газарян, Уӕрӕсейы Федерацийы Минӕвар Республикӕ Молдовайы Олег Васнецов, Республикӕ Хуссар Ирыстоны Официалон Минӕварады Сӕрдар Приднестроваг Молдаваг Республикӕйы Виталий Янковский, Приднестроваг Молдаваг Республикӕйы Официалон Минӕварады Сӕрдар Республикӕ Хуссар Ирыстоны Плиты Алан, Республикӕ Абхазы Ӕххӕстбарджын Минӕвар Приднестроваг Молдаваг Республикӕйы Александр Ватаман ӕмӕ иннӕ уазджытӕ.
Рабадты рӕстӕджы Приднестровьейы Фӕсарӕйнаг хъуыддӕгты министр Виталий Игнатьев йӕ доклады банысан кодта 2022 азы ӕддагполитикон архайды сӕйраг здӕхтытӕ, Республикӕйы раз лӕууӕг ног реалитӕ хынцгӕйӕ, сбӕрӕг кодта Министрады фидӕны сӕйраг хӕстӕ.
Джиоты Ӕхсар хуссарирыстойнаг дипломатты номӕй профессионалон бӕрӕгбоны цытӕн раарфӕ кодта приднестроваг коллегӕтӕн. Ӕнӕниздзинад, сабырад, ӕддагполитикон позицитӕ ӕнтыстджынӕй хахъхъӕд цы цӕуой Фыдыбӕстӕйы хӕрзиуӕгӕн, уый сын йӕ зӕрдӕ загъта.
Хуссар Ирыстоны Фӕсарӕйнаг хъуыддӕгты министр банысан кодта, Республикӕ Хуссар Ирыстонӕн йе ‘ддагон политикӕйы фыццаджыдӕр ахсджиаг кӕй у Приднестроваг Молдаваг Республикӕимӕ ахастытӕ фидар кӕнын, уымӕн ӕмӕ ацы Республикӕимӕ бирӕ ӕзты дӕргъы сырӕзтызты хӕларадон ахастытӕ, кӕцытӕ фидаргонд ӕрцыдысты дывӕрсон бадзырдон-барадон бындурӕй.
Цхинвал, 2023 азы ӕртхъирӕны мӕйы 10 бон