Гуырдзыстоны æддагполитикон уагдон, Евроцæдис, кæцыдæр европæйаг бæстæтæ, афтæмæй ма Азербайджан æмæ Японийы фидиуæн Хуссар Ирыстоны ацæугæ æвзæрстыты фæдыл нæ уыд æнæнхъæлæджы. Ахæм фидиуæнтæ нымайæм Хуссар Кавказы æцæг куыд у уавæр, ууыл нæразыдзинадыл.
Зæрдыл лæууын кæнæм, Хуссар Ирыстоны Президенты æвзæрстытæ кæй сты æрмæстдæр нæ паддзахады мидхъуыддаг. Ацыдысты Республикæйы Конституци æмæ национ закъондæттынады бындурыл, æмбæстагон активондзинад æмæ æхсæнадæмон цæстдарджыты хайадистимæ, кæцытæ банысан кодтой сæ легитимондзинад.
Хуссар Ирыстоны адæмы барвæндыл æртыккаг бæстæты дызæрдыгдзинад канд суверенон паддзахады мидхъуыддæгтыл бандавыны фæлварæнтæ не сты, фæлæ ма адæмæн кæй ис сæ хъысмæт сæхи къухтæй скъуыддзаг кæныны бар, ууыл æнæразыдзинад дæр.
Демократийы принциптыл цы бæстæтæ дзурынц, уыдон хъуыддаджы мидæг кæй нæ нымайынц Хуссар Ирыстоны цæуæг демократион процесстæ, уыцы позици зын бамбарæн у.
Гуырдзиаг фарсы фидиуæнтыл дзургæйæ, хъæуы банысан кæнын уый, æмæ æрмæстдæр кæй æвдисынц Гуырдзыстоны нæцæттæдзинад конструктивон диалогмæ. Ахæм фидиуæнтæ сабырадмæ нæ, фæлæ регионы уавæр æндыгъддæр кæнынц.
Хуссар Ирыстон у хæдбар паддзахад, æмæ никæцы æддагон фидиуæнтæй уымæн фæивæн нæй. Банымайдзысты нæ æндæр бæстæтæ æви нæ, уый у æрмæстдæр рæстæгмæ фарста. Нæ паддзахадæн сæйрагдæр у адæмы æууæнк, кæцы равдыстæуыд ацæугæ хъæлæскæнынады рæстæджы.
Уæлдай дызæрдыгдзинад æвзарын кæнынц интеграцион процессты уылтыл Хуссар Ирыстоныл «Уæрæсейы æндæвдад сфидар кæныны фæлварæнтæ»-йы фæдыл тезистæ. Уый у æрмæстдæр Уæрæсейы Федерациимæ æмцæдисон ахастыты мидис сзыгъуыммæ кæныны фæлварæн. Ацы ахастытæ сæйрагдæр тырнынц æдасдзинад, стабилондзинад æмæ экономикон размæдзыдмæ. Дыууæ бæстæйы ‘хсæн партнерадæн ис фидар барадон бындур æмæ иумæйаг интерестæ.
Сидæм дунеон æмæхсæнадмæ, цæмæй дывæр стандартты политикæ ныууадзой. Хуссар Ирыстон цы фæндаг равзæрста, уымæн фæивæн нал ис. Æддагон æндæвдадмæ нæкæсгæйæ, мах дарддæр кæндзыстæм нæ паддзахаддзинад фидар кæнын æмæ Уæрæсейы Федерациимæ стратегион партнерад размæ кæнын.
2026 азы рухæны мæйы 25-æм бон