Майрæмты мæйы 26-æм бон Республикæ Хуссар Ирыстоны делегаци Фæсарæйнаг хъуыддæгты Министр Джиоты Æхсары сæргълæудæй бабæрæг кодта Æхсæнадæмон фестиваль-конкурс «Сæрыстырты музыкæ»-йы гала-концерт Сухумы.
Мадзалы фæлгæтты Джиоты Æхсар бакаст Республикæ Хуссар Ирыстоны Президенты Хæстæ æххæстгæнæг Хъамболты Мараты арфæ Республикæ Абхазы Президент Бадра Гунбайæн Абхазы Æхсæнадæмон банымады боны фæдыл.
Сæрмагондæй, арфæйы дзырдæуы:
«2008 азы майрæмты мæйы 26-æм бон Уæрæсейы Федераци официалон æгъдауæй банымадта Хуссар Ирыстон æмæ Абхазы хæдбардзинад, нæ паддзахадты историйы уый у уæлдай ахсджиаг бон. Ацы историон уынаффæ æнустæм баззайдзæн нæ адæмты зæрдæты куыд рæстдзинад æмæ адæм сæхи къухтæй сæ хъысмæт скъуыддзаг кæныны символ, кæцытæ сæ хъæддыхдзинадæй бахъахъхъæдтой сæ зæххыл цæрыны бар.
Уæрæсейы æххуысы фæрцы Хуссар Ирыстон æмæ Абхазæн фæзынд æдас уавæрты цæрыны, экономикæ сæндидзын кæныны æмæ ныфсджынæй фидæнмæ кæсыны фадат.
Нæ адæм рагæй фæстæмæ баст сты æнæфехæлгæ хæларад æмæ æфсымæрадæй, фæрсæй фæрстæм цыдысты сæхæдæг сæ хъысмæт скъуыддзаг кæныны зын фæндагыл. Ныфс мæ ис, æмæ иумæйаг принциптæ, æппæт фадгуыты æмархайд æмæ æмгуыстад дарддæр дæр кæй уыдзысты фидар бындур не ‘мцæдисадæн».
Йæ арфæйы ма Хъамболты Марат загъта Абхазы æппæт æмбæстæгтæн дæр сабырад æмæ фæрныгады фæндиæгтæ.
Æрæмбырдуæвджыты раз раныхас кодтой Абхазы Президент Бадра Гунба æмæ Уæрæсейы Президенты Администрацийы къухдариуæггæнæджы фыццаг хæдивæг Сергей Кириенко, кæцы бакаст Уæрæсейы Президент Владимир Путины арфæ Æхсæнадæмон фестиваль-конкурс «Сæрыстырты музыкæ»-йы организатортæ, хайадисджытæ æмæ уазджытæн.
2026 азы майрæмты мæйы 26-æм бон