2026 азы тæргæйтты мæйы 19-æм бон Женевæйы ацыд Фæскавказы стабилондзинад æмæ æдасдзинады фæдыл Æхсæнадæмон дискусситы 66-æм раунд. Дискусситæ цæуынц Медведев æмæ Саркозийы 2008 азы майрæмты мæйы 12-æм æмæ рухæны мæйы 8-æм бонты бадзырдадтæм гæсгæ. Фембæлды хайад райстой Республикæ Хуссар Ирыстоны, Республикæ Абхазы, Гуырдзыстоны, Уæрæсейы Федерацийы, Америкæйы Иугонд Штатты делегацитæ, афтæмæй ма Европæйы Цæдисы, Иугонд Нациты Организацийы, Европæйы Æдасдзинад æмæ æмгуыстады фæдыл организацийы минæвæрттæ. Хуссарирыстойнаг делегацийы сæргъ лæууыд Президенты Паддзахадон Уынаффæгæнæг Коцты Константин.
Фембæлды хайадисджытæ равдыстой сæ цæттæдзинад Фæскавказы стабилондзинад æмæ æдасдзинады фæдыл Æхсæнадæмон дискусситæ дарддæр кæнынмæ, афтæмæй ма банысан кодтой регионалон стабилондзинад æмæ æдасдзинад бахъахъхъæнынæн ацы форматы ахсджиагдзинад.
Ацæугæ рабадтыты хуссарирыстойнаг делегаци фехъусын кодта Ереды трагедийæ 35 азы рацыды охыл. 1991 азы тæргæйтты мæйы 18-æм бон гуырдзиаг хæстонтæ æгъатырæй ныццагътой æнæхæцæнгарз ирæтты. Нысангонд æрцыд, ирон æмæ абхазаг адæмы ныхмæ ацы æмæ гуырдзиаг терроры бирæ æндæр ахæм амæттæгты рухс ном кæй домы рæстдзинад æмæ хъæуы саразын æппæт дæр, цæмæй Гуырдзыстоны 'рдыгæй мауал æрцæуа ног агресси.
Хуссар Ирыстон æмæ Гуырдзыстоны, афтæмæй ма Абхаз æмæ Гуырдзыстоны 'хсæн паддзахадон арæнмæ æввахс районты æдасдзинады фарстатыл дзургæйæ, Хуссар Ирыстон æмæ Гуырдзыстоны ‘хсæн паддзахадон арæны уавæр бæрæг æрцыд стабилон. Нысан æрцыд Инциденттæ аиуварс кæнын æмæ сæм афоныл хъус æрдарыны фæдыл иумæйаг механизмы æмæ «тæвд хахх»-ы архайды ахсджиагдзинад. Æрдзырдæуыд Хуссар Ирыстон æмæ Гуырдзыстоны 'хсæн паддзахадон арæны делимитаци æмæ демаркацийы фæдыл иумæйаг куыст райдайыны æнæмæнгдзинадыл.
Уæлдай хъусдард аздæхтæуыд тыхæй ма спайда кæныны фæдыл документыл бакуыстмæ. Хуссарирыстойнаг, абхазаг æмæ уæрæсейаг минæвæрттæ хæст сты ахæм хъуыдыйыл, цæмæй ацы проекты миниуджытæ развæлгъау æрцæуой бæрæг, уый ахъаз уыдзæн Дискусситы форматы ацы здæхты æнтысджын куыстæн.
Бæстонæй æрдзырдæуыд гуманитарон фарстатыл дæр, цыран сæйраг хъусдард аздæхтæуыд Хуссар Ирыстоны æмбæстæгтæй æбæрæгæй чи фесæфт, уыдон хъысмæтмæ. Хуссарирыстойнаг минæвæрттæ ма банысан кодтой, Гуырдзыстон кæй халы ирæтты – Хъазыбеджы районы (Тырсыгом) цæрджыты бартæ, кæдонæн цалдæр азы дæргъы сæ бон нæу сæ райгуырæн уæзæгмæ бахауын.
Лигъдæтты проблемæйы фæдыл ацы раунды дискусси нæ ацыд. Лигъдæтты темæйыл ныхас сног кæныны фадат уыдзæн æрмæстдæр уæд, кæд æмæ Гуырдзыстон æрлæууын кæна ацы проблемæйы аразгæ политизаци.
Фæскавказы æдасдзинад æмæ стабилондзинады фæдыл Æхсæнадæмон дискусситы радон фембæлд нысангонд æрцыд 2026 азы хурхæтæны-сусæны мæйтæм.
2026 азы тæргæйтты мæйы 20-æм бон