Тъæнджы мæйы 29-æм бон Республикæ Хуссар Ирыстоны Фæсарæйнаг хъуыддæгты министр Джиоты Æхсар хайад райста зонадон-практикон конференци «Украинæйы кризис: ратæдзæнтæ, райрæзты здæхт, геополитикон контекст»-йы, кæцы сорганизаци кодтой Тыбылты Алыксандры номыл Хуссар Ирыстоны Паддзахадон университет (ХИПУ) æмæ Уæрæсейы Федерацийы Минæварад Республикæ Хуссар Ирыстоны.
Дискусси здæхт уыд украинаг национализм/нацизмы ратæдзæнтæм, нацизм æмæ неонацизм парахат кæныны уавæрмæ, Украинæйы расизм æмæ ксенофобийы апарахатмæ, уæрæсейаг фарсæрдыгæй историон рæстдзинад бахъахъхъæныны фæлварæнтæм.
РХИ-йы Президенты Паддзахадон Уынаффæгæнæг Коцты Константин бакаст Хуссар Ирыстоны Президент Гаглойты Аланы арфæ мадзалы хайадисджытæн. Арфæйы ныхæстæ ма загътой Тыбылты Алыксандры номыл ХИПУ-йы Ректор Тедеты Вадим, УФ-йы Уæлвæткон æмæ Æххæстбарджын Минæвар РХИ-йы Марат Кулахметов, РХИ-йы Парламенты Сæрдар Æлборты Алан, РХИ-йы Фæсарæйнаг хъуыддæгты министр Джиоты Æхсар.
Мадзалы рæстæджы докладтимæ раныхас кодтой украинаг фарстаты фæдыл зынгæ уæрæсейаг эксперттæ – Уæрæсейы ФХъМ-йы Хæдбар Паддзахадты Æмхæларады Дыккаг департаменты Сæйраг уынаффæгæнæг Эдуард Вертьянов, философон зонæдты доктор, АНО «Æхсæнадон æмæ информацион æмгуыстады центр «Европæ»-йы директор, историон зонæдты кандидат, философон зонæдты доктор Эдуард Попов, Тирасполы социалон-политикон иртæстыты æмæ регионалон райрæзты институты директор, историон зонæдты кандидат Игорь Шорников, афтæмæй ма хуссарирыстойнаг эксперттæ, Тыбылты Алыксандры номыл ХИПУ-йы лектортæ.
Цхинвал, 2024 азы тъæнджы мæйы 29-æм бон