Майрæмты мæйы 25-æм бон Республикæ Хуссар Ирыстоны Фæсарæйнаг хъуыддæгты министр Джиоты Æхсар фембæлд Республикæ Никарагуайы Фæсарæйнаг хъуыддæгты министр Денис Монкада Колиндресимæ, кæцы делегацийы сæргъ æрцыд Цхинвалмæ Уæрæсейы Федерацийы ‘рдыгæй Республикæ Хуссар Ирыстоны хæдбардзинады банымадæй 15 азы рацыды цытæн бæрæгбонмæ.
Фембæлды ма хайад райстой Республикæ Хуссар Ирыстоны Фæсарæйнаг хъуыддæгты министры Фыццаг хæдивæг Цхуырбаты Андрей, Республикæ Хуссар Ирыстоны Уæлвæткон æмæ Æххæстбарджын Минæвар Республикæ Никарагуайы Козаты Нарим æмæ Республикæ Никарагуайы Уæлвæткон æмæ Æххæстбарджын Минæвар Республикæ Хуссар Ирыстоны Альба Асусена Торрес Мехия.
Джиоты Æхсар бузныджы ныхæстæ загъта уазджытæн, Хуссар Ирыстоны адæмæн ахæм ахсджиаг бæрæгбоны кæй саккаг кодтой æмæ кæй æрцыдысты, уый фæдыл.
Денис Монкада дæр раарфæ кодта Джиоты Æхсарæн бæрæгбоны фæдыл æмæ йæ зæрдæ загъта хуссарирыстойнаг адæмæн сабырдзинад æмæ фæрныгад.
Ныхасы рæстæджы Æддагполитикон уагдæтты сæргълæуджытæ банысан кодтой хуссарирыстойнаг-никарагуайаг ахастыты хæларадон здæхт æмæ, æхсæнадæмон уавæр хынцгæйæ, загътой сæ хъуыдытæ глобалон æмæ регионалон æдасдзинады фæдыл.
Политикон диалог арфдæр кæныны æмæ дыууæ паддзахады адæмы хæрзиуæгæн æмгуыстад фидардæр кæныны фæдыл дыууæ фарс дæр равдыстой сæ разыдзинад.
Ныхас ацыд æргом хæларадон уавæры.
Фембæлды кæронбæттæн дыууæ фарс дæр сарæзтой кæрæдзийæн лæвæрттæ.
Цхинвал, 2023 азы майрæмты мæйы 25-æм бон