Æрвылаз дæр зæрдæвæрæны мæйы 20-æм бон Хуссар Ирыстоны нысан кæнынц гуырдзиаг агрессийы амæттæгты Мысæн бон.
1992 азы зæрдæвæрæны мæйы 20-æм бон, гуырдзиаг хæстон агресси Хуссар Ирыстоны ныхмæ куы сытынг, уæд Зары «царды фæндагыл» гуырдзиæгтæ æмбæхст ранæй æгъатырæй ныццагътой, сæ цард фервæзын кæнынмæ Хуссар Ирыстонæй Цæгатмæ чи лыгъд, уыцы ирон æмбæстæгты. Уыцы æбуалгъ фыдракæнды фæмард 33 æнаххос адæймаджы, уыдоны нымæцы сывæллæттæ, сылгоймæгтæ, зæрæдтæ.
Ацы аз дæр трагедийы бынаты мемориал «Хъынцъымгæнаг мад»-ы раз Зары хъæуы ацыд фыдохы акци. Хайад дзы райстой Республикæ Хуссар Ирыстоны къухдариуæгад Президент Гаглойты Аланы сæргълæудæй, Уæрæсейы Минæвар Хуссар Ирыстоны Марат Кулахметов, делегаци РЦИ-Аланийæ, Республикæйы министрадты æмæ уагдæтты минæвæрттæ, Зары трагедийы фæмардуæвджыты хиуæттæ, æхсæнад. Акцийы хайад райстой Республикæ Хуссар Ирыстоны Фæсарæйнаг хъуыддæгты министрады минæвæрттæ дæр.
Æрæмбырдуæвджытæ дидинтæ сæвæрдтой Зары трагедийы амæттæгты цыртмæ. Гуырдзиаг фашистты къухæй чи фæмард æмæ йæ цард чи ратта Райгуырæн бæстæйы хæдбардзинады сæрыл тохы, уыдоны рухс нæмттæ ссардтой иу минут æдзæмæй алæугæйæ.
Цхинвал, 2023 азы зæрдæвæрæны мæйы 20-æм бон